BRANDBERG RHINO RUN

Broers het die korte geskiedenis van die Renosterdraf op Uis herhaal toe Erich en Albertus Goeieman van Walvisbaai die eerste plekke in die drafnommers ingeneem het. Erich het die hoofbergwedren oor 26 km gewen en Albertus was eerste in die 13 km-wedren.
Deelnemers aan die Brandberg Rhino Run het binne 'n jaar meer as verdubbel met die 264 deelnemers Saterdag teenoor die 108 van verlede jaar. Die toeloop van atlete het Uis volgestoot met baie van die drawwers en fietsryers wat hul tente by die wegspringplek, die Daureb Isib-ruskamp, opgeslaan het.
Die opbrengs van die byeenkoms ná alle aftrekkings was N$251 000, 'n bedrag wat reeds vir die bewaring van Namibië se swartrenosters oorbetaal is. (DE)